Վահագն Չախալյանի գործունեությունը սպառնու՞մ է ՀՀ ազգային անվտանգությանը

 Հոկտեմբերի 15-ին Երևանի Կենտրոն և Նորք Մարաշ առաջին ատյանի դատարանում քննվեց Վահագն Չախալյանի հայցն ընդդեմ ՀՀ ոստիկանապետ Հայկ Հարությունյանի որոշման: Վ. Չախալյանը բողոքարկել էր ՀՀ ոստիկանապետի որոշումը, ըստ որի` նրան 3 տարով վտարել էին ՀՀ տարածքից:

Նախորդ նիստի ժամանակ դատարանի միջամտությամբ ուղարկված նամակին այս անգամ էլ ոստիկանապետը պատասխանել էր, որ իրենք քննարկել են Վ. Չախալյանի` իր դատական նիստին ներկայանալու հարցը, բայց ,,նպատակահարմար չեն գտել’’ Վ. Չախալյանին ՀՀ մուտքի թույլտվություն տալ:

Մինչ այժմ Վ. Չախալյանը մեղադրվում էր սահմանն ապօրինի հատելու մեջ: Իսկ երեկվա նիստին ոստիկանության ներկայացուցիչ Վալերի Գրիգորյանը հայտարարեց, որ ոստիկանապետին ուղղված նամակի պատասխանում հստակ նշված է հոդվածը, համաձայն որի էլ նրան թույլ չեն տալիս մուտք գործել ՀՀ տարածք: Դա ‘’ՀՀ-ում օտարերկրյա քաղաքացիների իրավական վիճակի մասին” նախկին օրենքի 32-րդ հոդվածն է, ըստ որի` Վ. Չախալյանի գործողությունները սպառնացել են ՀՀ ազգային անվտանգությանը, հասարակական կարգին, տարածքային ամբողջականությանը և այլն: “ՀՀ ԱԱԾ-ն օպերատիվ տեղեկատվություն է ստացել Չախալյանի գործունեության վերաբերյալ, որի հիման վրա էլ նրան ձերբակալել են և այժմ էլ թույլ չեն տալիս մուտք գործել ՀՀ”,-ասաց Վալերի Գրիգորյանը:

«Մինչ այժմ իմ պաշտպանյալին պաշտոնապես նման մեղադրանք չէր ներկայացվել, նրա ձերբակալությունն ու վտարումը հիմնված էր սահմանն ապօրինի հատելու պատճառաբանությամբ: Սա արդեն մեր գործին այլ ուղղվածություն է տալիս»,- նշեց Տ. Հայրապետյանը:

Տ. Հայրապետյանի այն հարցին, թե կա՞ն արդյոք ապացույցներ, որոնք վկայում են Վ. Չախալյանի «վտանգավոր» գործունեության մասին, ոստիկանության ներկայացուցիչը պատասխանեց, որ դրանք հավանաբար ՀՀ ԱԱԾ-ում են, քանի որ նրանք են ստացել այդ օպերատիվ տեղեկատվությունը. «Եթե նույնիսկ ենթադրենք, որ Վ. Չախալյանին այդ հոդվածով են վտարել, ապա այժմ ‘’ՀՀ-ում օտարերկրյա քաղաքացիների իրավական վիճակի մասին” օրենքը այլևս չի գործում, կորցրել է իր ուժը, Սահմանադրությանն էլ ասում է, որ անձի իրավական վիճակը վատթարացնող օրենքները հետադարձ ուժ չունեն, իսկ քանի որ օրենքը չի գործում, օրենքից հետևած որոշումն էլ պետք է չգործի»,-հավելեց դատապաշտպանը:

Դատական նիստը կրկին հետաձգվեց, քանի որ հայցվոր կողմի ներկայացուցիչ Տիգրան Հայրապետյանն իր միջնորդությամբ ժամանակ խնդրեց՝ ապացույցներ ներկայացնելու Վ. Չախալյանի ազգային անվտանգությանն ու հասարակական կարգին չվտանգող գործունեության վերաբերյալ: